Grampanchayat Result: રાજ્યમાં યોજાયેલી ગ્રામપંચાયતની ચૂંટણીનું પરિણામ જાહેર થઈ ગયું છે. સવારે 8 વાગ્યાથી મતગણતરી શરૂ કરવામાં આવી હતી. સમગ્ર મતગણતરી CCTV કેમેરા દેખરેખ હેઠળ થશે. ગ્રામપંચાયતની ચૂંટણીમાં સરેરાશ 77 ટકા મતદાન થયું હતું.

પાટણના ધારણોજ ગામે વોર્ડ નંબર -7 માટેના ઉમેદવારની જીત ટાઈ થઈ હતી. જશીબેન પટેલ અને રંજનબેન ઠાકોર વચ્ચે ટાઇ પડતા અને પુનઃમતગણતરીની અરજી કરાઈ હતી. પુનઃમતગણતરી કરવામાં આવી છતાં ટાઇ યથાવત રહેતા ચિઠ્ઠી ઉછાળી વિજેતા નક્કી કરવામાં આવ્યા હતા. આ બાદ જશીબેન બાબુભાઈ પટેલને વિજેતા જાહેર કરવામાં આવ્યા હતા.

મહેસાણા જિલ્લાની પઢારીયા ગ્રામ પંચાયતની ચૂંટણી પરિણામમાં રસાકસી જોવા મળી હતી. આ પછી રતનસિંહ ચાવડા માત્ર એક મતથી સરપંચ બન્યા હતી. છેલ્લે સુધી કોણ વિજેતા બનશે તે નક્કી ના હતું. જેના કારણે ગ્રામજનોમાં ભારે ઉત્તેજના વધારી છે. રતનસિંહ ચાવડાની એક વોટથી જીતએ દર્શાવે છે કે ગ્રામ પંચાયતની ચૂંટણીમાં એક એક વોટ નું કેટલું મહત્વ હોય છે.

સાબરકાંઠાના વડાલીના ધામડી ગ્રામ પંચાયતમાં યુવા સરપંચની જીત થઈ છે. ધામડી ગ્રામ પંચાયતના જયંતિભાઈ પાટીદારના પુત્ર ભરત પાટીદાર વિજય થયા છે. ધામડી ગ્રામ પંચાયતમાં સરપંચના ચાર ઉમેદવારો વચ્ચે ટક્કર હતી. મતગણતરી મથકે વિજયી ઉમેદવારને લોકોએ વધાવ્યા હતા.

ભરૂચના જંબુસરના ખાનપુર દેહ ગામે પતિ-પત્નિ બન્નેએ ચૂંટણી જીતી હોવાનું સામે આવ્યું છે. પત્નિ સરપંચ તરીકે તો પતિ સભ્ય તરીકે ચૂંટાઈ આવ્યા છે. અબ્દુલ રસીદ પટેલ અને તેમના પત્નિ વહીદા પટેલ બન્નેએ ચૂંટણી લડી હતી. પતિપત્નિ બન્નેનો વિજય થતા ઘોડા પર વિજયોત્સવ મનાવાયો હતો.

માતાનામઢ ગ્રામ પંચાયત ચૂંટણી પરીણામમાં કોમી-એકતાના દર્શન થયા છે. કારણ કે માતાનામઢ ગ્રામ પંચાયત સરપંચ પદે મુસ્લિમ અગ્રણીનો ભવ્ય વિજય થયો છે.