ચિરાગ મેઘા, સાબરકાંઠા: ઈડર ગઢ તેમજ તળેટી વિસ્તારમાં આજે એક લાખ જેટલા સીડબોલનું વાવેતર કરાયું છે. જેમાં ઈડર શહેરની 15 જેટલી સંસ્થાઓ ભાગીદાર બની હતી. તેમજ 500થી વધુ લોકો દ્વારા ઇડર ગઢ વિસ્તારને હરિયાળો બનાવવાનો પ્રયાસ કરાયો છે.

સાબરકાંઠામાં સૌથી વધુ ગરમીનો પારો ઈડર શહેરમાં અનુભવાય છે. સાથોસાથ અરવલ્લીની હારમાળા હોવાના પગલે ઈડર સહિત આસપાસના વિસ્તારોમાં પણ વ્યાપક ગરમીનો અહેસાસ થતો હોય છે. ત્યારે આજે ઈડર શહેરના વિવિધ 15 જેટલી સંસ્થાઓના આગેવાનો સહિત અભ્યાસ કરનારા વિદ્યાર્થીઓએ એક લાખ જેટલા સીડબોલનું વાવેતર કર્યું છે. સામાન્ય રીતે ઈડર શહેરમાં ઉનાળાની ગરમી દરમિયાન સરેરાશ તાપમાન 45 ડિગ્રીથી વધી જાય છે. જેના પગલે શહેરીજનો ત્રાહિમામ પોકારી ઊઠે છે. જોકે ઈડર ગઢને હરિયાળો બનાવવા માટે આજે પહેલીવાર એકસાથે 15 સંસ્થાઓ આગળ આવી છે. તેમજ અરવલ્લીની હારમાળામાં આવતા ઈડરગઢ વિસ્તાર તેમજ તળેટી વિસ્તારમાં સીડબોલનું વાવેતર કરાયું છે. જોકે વાવેતર તો વન વિભાગ દ્વારા કરાતું હોય છે, પરંતુ તેની જાળવણી ન થતી હોવાના પગલે મોટાભાગના વૃક્ષો નાશ પામતા હોય છે. ત્યારે આજે ભાગ લેનાર વિદ્યાર્થીઓ દ્વારા વૃક્ષને નવજાત બાળક સમાન ગણી તેનું જતન કરવામાં આવે તો આવનારા સમયમાં ઈડર ગઢ વિસ્તાર પણ વૃક્ષોથી લીલોછમ બની શકે છે.

સામાન્ય રીતે વૃક્ષારોપણનું કામ વન વિભાગ દ્વારા થતું હોય છે. તેમજ નાના મોટા વૃક્ષો વાવવા માટે સ્થાનિક કક્ષાએ પ્રયાસ થતો હોય છે. ત્યારે અરવલ્લીની હારમાળામાં આવેલા ઈડર ગઢ સહિત તળેટી વિસ્તારને ફરીવાર લીલોછમ બનાવવા આજે એક સાથે 500થી વધુ લોકો કામે લાગ્યા હતા. તેમજ એક લાખ જેટલા સીટબોલનું વાવેતર કરાયું છે. જેના પગલે આવનારા સમયમાં ઈડર ગઢ વિસ્તારમાં ફરી એકવાર ગરમી ઘટાડવા સહિત સ્થાનિક લોકોને પડતી પારાવાર સમસ્યાઓમાંથી પણ છુટકારો મળશે તેઓ પ્રયાસ કરાયો છે.

જોકે આવનારા સમયમાં ઈડર ગઢ વિસ્તાર તેમજ તળેટી વિસ્તાર કેટલો લીલો બને છે એ તો સમય જ બતાવશે, પરંતુ આજે કરાયેલો આ પ્રયાસ આસપાસના કુલ 15 જેટલી સંસ્થાઓ માટે પ્રેરણારૂપ બનશે તે નક્કી છે.