અમદાવાદ: 16 સપ્ટેમ્બર, 2025ના રોજ બિહાર રાજ્યના મોતીહારી જિલ્લામાં આવેલા બિરેયા પોલીસ સ્ટેશન વિસ્તારમાં એક હત્યાનો બનાવ બન્યો હતો. ખોરવા ગામથી મઠિયા જતા રોડ પર બે અજાણ્યા ઇસમોએ મોટરસાયકલ પર સવાર અમોદકુમાર નામના વ્યક્તિ પર ચાર રાઉન્ડ ફાયરિંગ કરીને તેની હત્યા કરી હતી.

બિહાર પોલીસની તપાસમાં એવું બહાર આવ્યું કે, મૃતક અમોદકુમારની પત્નીને વિકાસ નામના યુવક સાથે પ્રેમસંબંધ હતો. આ પ્રેમ સંબંધના કારણે પત્નીએ તેના પ્રેમી સાથે મળીને બહારથી શૂટરો બોલાવીને હત્યા કરાવી હતી.

આ બનાવ અંગે બિહારના બિરેયા પોલીસ સ્ટેશનનો સ્ટાફ ફરાર આરોપીને શોધવા માટે અમદાવાદ આવ્યો હતો અને સ્થાનિક પોલીસની મદદ માગી હતી. અમદાવાદ શહેર ક્રાઇમ બ્રાન્ચના ઉચ્ચ અધિકારીઓના માર્ગદર્શન અને સૂચના હેઠળ ક્રાઇમ બ્રાન્ચની ટીમે હ્યુમન સોર્સ અને ટેકનિકલ સપોર્ટના આધારે તપાસ હાથ ધરી હતી.

આ તપાસ દરમિયાન શૂટર મોકલનાર આરોપી ગૌતમકુમાર જયમંગલ યાદવને ઝડપી પાડવામાં સફળતા મળી છે. આરોપી ગૌતમ કુમાર હાલ સોમનાથ ભૂદરનો આરો, ગણેશ મંદિર પાસે, ફુલબજારની પાછળ, જમાલપુર, અમદાવાદમાં રહે છે અને મૂળ ગામ મસહાનરોત્તમ, તા. બેંગાહી, જિલ્લો સીતામઢી, બિહારનો વતની છે.

ક્રાઇમ બ્રાન્ચની આ પ્રશંસનીય કામગીરી બાદ આરોપીને બિરેયા પોલીસ સ્ટેશનના સ્ટાફને સોંપવાની કાર્યવાહી હાથ ધરવામાં આવી છે.