દશરથસિંહ રાઠોડ, અમરેલીઃ જિલ્લામાં સૌથી મોટી રોજગારી આપતી ‘અમર ડેરી’નું સંચાલન કરતી સંસ્થા અમરેલી જિલ્લા દૂધ ઉત્પાદક સંઘ લિમિટેડની હાલમાં યોજાયેલી ચૂંટણીમાં તમામ ઉમેદવારો બિનહરીફ જાહેર થયા છે. વર્ષ 2002માં અમરેલી જિલ્લા દૂધ ઉત્પાદક સંઘ લિમિટેડની સ્થાપના બાદ યોજાયેલી તમામ સાત ચૂંટણી બિનહરીફ થઈ છે.

અમરેલી જિલ્લામાં 35 હજાર પરિવારોને રોજગારી પૂરી પાડતી અમર ડેરીની ચૂંટણીમાં વધુ એક વખત તમામ ઉમેદવારો બિનહરીફ જાહેર થયા છે. અમરેલી જિલ્લા દૂધ ઉત્પાદક સંઘ લિમિટેડની હાલમાં યોજાયેલી ચૂંટણીમાં ઈફ્કોના ચેરમેન દિલીપ સંઘાણી, રાજકોટના સાંસદ પરશોત્તમ રૂપાલા, અમર ડેરીના ચેરમેન અશ્વિન સાવલીયા, વાઇસ ચેરમેન મુકેશ સંઘાણી સહિત કુલ 17 ઉમેદવારોએ ઉમેદવારી નોંધાવી હતી. આ સિવાય અન્ય કોઈ પણ ઉમેદવારી ફોર્મ નહીં ભરાતા તમામ 17 ઉમેદવારો બિનહરીફ થયા છે. અમર ડેરીના ચેરમેન અશ્વિન સાવલીયાએ જણાવ્યું હતું કે, છેલ્લા 23 વર્ષથી આ સંસ્થા બિનહરીફ થઈ રહી છે.

અમરેલી જિલ્લામાં પશુપાલન થકી રોજગારી મળે તે માટે સહકારી આગેવાન દિલીપ સંધાણી અને પરશોત્તમ રૂપાલા દ્વારા આ વર્ષ 2002માં દૂધ સંઘની સ્થાપના કરવામાં આવી છે. વર્ષ 2005માં અમર ડેરીનો પાયો નાંખવામાં આવ્યો હતો. વર્ષ 2007માં નાનકડા બિલ્ડિંગમાં અમર ડેરીની શરૂઆત થઈ હતી. અમર ડેરીની શરૂઆત માત્ર 26 દૂધ મંડળીઓ અને સાડા બારસો લીટર દૂધની આવક સાથે થઈ હતી. આજે અમર ડેરી સાથે 532 મંડળીઓ જોડાયેલી છે અને દરરોજ બે લાખ લીટર દૂધની આવક થાય છે.

માત્ર ખેતી આધારિત અમરેલી જિલ્લામાં છેલ્લા બે દાયકાથી પશુપાલનનો વ્યવસાય ફૂલ્યો ફાલ્યો છે. કારણ કે, આજે અમર ડેરીનું વાર્ષિક ટર્નઓવર 500 કરોડનું છે. જેનો સીધો ફાયદો અમરેલી જિલ્લાને મળી રહ્યો છે.