Sabarkantha: સાબરકાંઠા જિલ્લામાં ભર શિયાળાની ઋતુ દરમિયાન થયેલા કમોસમી માવઠાથી ખેડૂતોની ચિંતા વધી છે. રવિ પાકોની વાવણી નજીક આવતા ખેડૂતો પોતાની મહેનતનાં પાકને લઈને ચિંતિત દેખાઈ રહ્યા છે. પોશીના, ખેડબ્રહ્મા, વડાલી સહિતના ગ્રામ્ય પંથકમાં માવઠું પડતા ખેતરોમાં ભેજ વધ્યો છે, જેના કારણે પાકને નુકસાન થવાની આશંકા વ્યક્ત કરવામાં આવી રહી છે.

જિલ્લામાં આ વર્ષે રવિ સીઝનમાં કપાસ, ઘઉં, રાયડો, બટાકા સહિતના પાકનું વિપુલ પ્રમાણમાં વાવેતર થયું છે. પરંતુ વાવણીની વચ્ચે જ થયેલા અણધાર્યા વરસાદે ખેડૂતોની મહેનત પર પાણી ફરી વળવાની પરિસ્થિતિ ઊભી કરી છે. હવામાન વિભાગે આગામી 1 અને 2 ડિસેમ્બરે વધુ માવઠાની આગાહી કરતા ખેડૂત વર્ગની ચિંતામાં વધારો થયો છે.

કમોસમી માવઠું ખેડૂતો માટે શિયાળાની ઋતુમાં દુષ્કાળ સમાન બની રહ્યું છે. દવા, બિયારણ, ખાતર સહિત મજૂરીનો ખર્ચ નિર્ભર કરવો મુશ્કેલ બને તેવી આશંકાઓ વ્યક્ત કરી છે. તેમજ કુદરત સામે ખેડૂતો લાચાર બની ગયા છે.

કડકડતી ઠંડી વચ્ચે વરસતા માવઠાએ સાબરકાંઠાના ખેડૂત આલમને મુશ્કેલીમાં મૂકી દીધો છે. પાક બગડવાની અને વધુ પડતા ખર્ચનો ભાર વધવાની આશંકા વચ્ચે ખેડૂતો સરકાર અને કૃષિ વિભાગ તરફથી સહાયની અપેક્ષા રાખી રહ્યા છે.