ગીર-સોમનાથઃ સુત્રાપાડાના પ્રાચી તીર્થમાં આવેલી સરસ્વતી નદીમાં ઘોડાપૂર આવ્યું હતું. તેને પગલે માધવરાયજી ભગવાન પાણીમાં જળમગ્ન થયા છે. તાલાલાથી પસાર થતી સરસ્વતી નદીમાં પૂર આવતા ભગવાન માધવરાયજીનું મંદિર 10 ફૂટથી વધુ પાણીમાં જળમગ્ન થઈ ગયું છે.

ઉલ્લેખનીય છે કે, ગીર-સોમનાથ જિલ્લામાં ગત રાતથી મેઘરાજા ધમાકેદાર બેટિંગ કરી રહ્યા છે. ત્યારે ઉપરવાસમાં ભારે વરસાદને કારણે નદીઓમાં નવા નીરની આવક થઈ છે અને પૂર જેવી સ્થિતિ સર્જાઈ છે.

મોડી રાત્રે ગીર-સોમનાથમાં મેઘરાજાએ તોફાની બેટિંગ ચાલુ કરી હતી. જિલ્લાના તમામ વિસ્તારોમાં મેઘરાજાએ ભૂક્કા બોલાવ્યા હતા. જેમાં સૂત્રાપાડામાં સૌથી વધુ 9 ઇંચ વરસાદ ખાબક્યો હતો.

વેરાવળમાં 6 ઇંચ તો ગીર-ગઢડા સહિત કોડીનારમાં 5 ઇંચ વરસાદ નોંધાયો છે. જ્યારે તાલાળા અને ઉનામાં ત્રણ-ત્રણ ઇંચ વરસાદ ખાબક્યો છે. સૂત્રાપાડામાં છેલ્લા 24 કલાકમાં 12 ઇંચ વરસાદ નોંધાયો છે.

સૂત્રાપાડામાં તોફાની બેટિંગથી પ્રશ્નાવાડા ગામના નીચાણવાળા વિસ્તારોમાં પાણી ભરાયાં છે. આ સાથે જ અનેક ઘરોમાં પાણી ભરાયાં છે. મોડી રાત્રે મેઘરાજાએ લોકોની ઊંઘ બગાડી છે.

સૂત્રાપાડાનું પ્રશ્નાવડા ગામ જળબંબાકાર થયું છે. પ્રશ્નાવાડામાં અનેક ઘરોમાં પાણી ભરાયાં છે. મોડી રાત્રે સૂત્રાપાડા પંથકમાં મેઘાએ ધમાકેદાર બેટિંગ કરી છે. જેમાં 200થી વધુ ઘરોમાં પાણી ભરાયાં છે. ઘરોમાં પાણી ભરાતા લોકોએ રાત ઉજાગરા કર્યા છે. અનેક ઘરોની ઘરવખરી પલળી છે. છેલ્લા વીસ વર્ષથી આ જ પરિસ્થતિ છે, છતાં તંત્ર કે નેતાઓના પેટનું પાણી હલતું નથી.