Harsh Sanghavi: અમદાવાદના મકરબા વિસ્તારમાં આજે નવનિર્મિત ખાખી ભવનનું લોકાર્પણ નાયબ મુખ્યમંત્રી અને ગૃહમંત્રી હર્ષ સંઘવીના હસ્તે કરવામાં આવ્યું. અંદાજે 8.50 કરોડ રૂપિયાના ખર્ચે તૈયાર થયેલ આ ખાખી ભવન પોલીસ કર્મચારીઓ અને અન્ય જિલ્લાઓમાંથી તપાસ માટે અમદાવાદ આવતા અધિકારીઓ માટે આધુનિક સુવિધાઓથી સજ્જ છે. ખાખી ભવનમાં રહેવાની વ્યવસ્થા સાથે કિચન, મેસ, ઇન્ડોર ગેમ્સ, જીમ, લોન્ડ્રી રૂમ સહિતની તમામ સુવિધાઓ ઉપલબ્ધ કરવામાં આવી છે.

મુદ્દામાલ ફરિયાદીઓને પરત સોંપવામાં આવ્યો

આ કાર્યક્રમમાં ડીજીપી વિકાસ સહાય સહિત વરિષ્ઠ પોલીસ અધિકારીઓ હાજર રહ્યા હતા. આ પ્રસંગે પ્રોજેક્ટ બ્લુ સર્કિટનું નિદર્શન કરવામાં આવ્યું તેમજ પ્રોજેક્ટ અભયયાત્રી અને ADR-SHIELD પ્લેટફોર્મનું અનાવરણ પણ કરવામાં આવ્યું. “તેરા તુજકો અર્પણ” કાર્યક્રમ અંતર્ગત ગુનામાંથી જપ્ત કરાયેલ મુદ્દામાલ ફરિયાદીઓને પરત સોંપવામાં આવ્યો.

લેટેસ્ટ સમાચાર જાણવા અહીં ક્લિક કરી જોડાઓ અમારી Whatsapp Channel સાથે

જનતા સાથે સીધી મુલાકાત

આ સાથે વિભાગીય પોલીસ અધિકારી, અસલાલી વિભાગના નવીન બિલ્ડિંગનું લોકાર્પણ અને વિરમગામ ટાઉન પોલીસ લાઇનનું ખાતમુહૂર્ત પણ કરવામાં આવ્યું. પોતાના સંબોધનમાં ગૃહમંત્રી હર્ષ સંઘવીએ જણાવ્યું કે અમદાવાદ ગ્રામ્ય પોલીસ છેલ્લા કેટલાક વર્ષોથી ઉત્તમ કામગીરી કરી રહી છે. તેમણે પોલીસિંગમાં ટેક્નોલોજીનો વધુ ઉપયોગ, નાગરિકો સાથે સંવેદનશીલ વર્તન અને ગુનેગારોમાં પોલીસનો ડર રહે તેવા વ્યવહાર પર ભાર મૂક્યો. તેમણે કહ્યું કે પોલીસ સ્ટેશનમાં ફરિયાદીઓને માનવિય વ્યવહાર મળશે તો નાગરિકોમાં વિશ્વાસ વધશે. સાથે જ પીઆઇ અને ડીવાયએસપી દ્વારા જનતા સાથે સીધી મુલાકાત માટે સમય નક્કી કરવાની જરૂરિયાત પર પણ તેમણે ભાર મૂક્યો.