Amreli News: અમરેલી જિલ્લાના ધારી તાલુકાના ગોપાલગ્રામમાં આજે એક કરૂણ ઘટના સામે આવી છે. ગામની નજીક આવેલી વાડીમાં ખેતી કામ કરી રહેલા પરિવાર સાથે હાજર પાંચ વર્ષના બાળક પર દીપડાએ અચાનક હુમલો કર્યો હતો, જેના કારણે બાળકનું મૃત્યુ થયું હતું. આ ઘટનાથી સમગ્ર વિસ્તારમાં શોકની લાગણી ફેલાઈ ગઈ છે. અવાર-નવાર અમરેલી કે ગીરના વિસ્તારમાં આવા બનાવો બની રહ્યા છે. છતાં કોઈ એવા પગલા ભરવામાં આવતા નથી કે જેના કારણે દીપડા કે સિંહના કારણે મોતનો આંકડો થંભી જાય.

પોસ્ટમોર્ટમ માટે ખસેડવામાં આવ્યો

સાહિલ રાકેશભાઈ કટારા નામનો બાળક પોતાના માતા-પિતા સાથે સવારે અંદાજે 8:30 વાગ્યે વાડીએ કામ કરી રહ્યો હતો. વાડી પાસે આવેલા તુવેરના ખેતરમાં દીપડો છુપાયેલો હતો. અચાનક દીપડાએ બહાર આવી બાળક પર હુમલો કર્યો, જેના કારણે પરિવારજનોને પણ બાળકને બચાવવાની તક મળી નહીં. આ પછી બાળકના મૃતદેહને ગોપાલગ્રામની પ્રાથમિક આરોગ્ય કેન્દ્રમાં પોસ્ટમોર્ટમ માટે ખસેડવામાં આવ્યો હતો.

લેટેસ્ટ સમાચાર જાણવા અહીં ક્લિક કરી જોડાઓ અમારી Whatsapp Channel સાથે

યોગ્ય કાર્યવાહી કરવાની માંગ

ઘટનાની માહિતી મળતાની સાથે વન વિભાગની ટીમ તાત્કાલિક સ્થળ પર પહોંચી હતી. વન વિભાગ દ્વારા આસપાસના વિસ્તારમાં તપાસ શરૂ કરી દેવામાં આવી છે અને દીપડાની હિલચાલ પર નજર રાખવા માટે જરૂરી પગલાં લેવામાં આવી રહ્યા છે. સાથે જ, સ્થાનિક ગ્રામજનોએ વન વિભાગ પાસે વિસ્તારની સુરક્ષા વધારવા અને આવા બનાવો ફરી ન બને તે માટે યોગ્ય કાર્યવાહી કરવાની માંગ કરી છે.