Khedbrahma Rain: સતત ત્રણ દિવસથી સાબરકાંઠાના ખેડબ્રહ્મા તાલુકાના ગ્રામ્ય વિસ્તારોમાં અવિરત વરસાદને પગલે નીચાણવાળા વિસ્તારોમાં વરસાદી પાણી ભરાયા છે. સાથે મેઘો મુશળધાર વરસતા કપાસ મગફળી સોયાબીન સહિતના પાકોની વાવણી કરાયેલ ખેતરોમાં વરસાદી પાણી ભરાતા ખેડૂતોની હાલત કફોડી બની છે. અગાઉ પણ ખેડબ્રહ્માના રોદરા, દેરોલ સહિતના પંથકમાં વરસાદે ભારે તારાજી સર્જી હતી. ત્યારે ફરીએકવાર મુશળધાર વરસેલા વરસાદે ખેડબ્રહ્માના ગ્રામ્ય પંથકમાં ભારે વરસાદને પગલે મોટાભાગના ખેતરો બેટમાં ફેરવાયા છે.

ખેડૂતોની હાલત કફોડી બની
સાબરકાંઠા સહિત ઉપરવાસમાં સતત ત્રણ દિવસથી ભારેથી અતિભારે વરસેલા વરસાદે ખેડબ્રહ્માના ગ્રામ્ય પંથકમાં ભારે તારાજી સર્જી છે. ખેડબ્રહ્માના રોદરા, દેરોલ સહિતના પંથકમાં વરસેલા મુશળધાર વરસાદને લઈ ખેતરો સહિત મોટાભાગના રસ્તા પર વરસાદી પાણી ભરાયા હતા. ખેતરોમાં વરસાદી પાણી ભરાતા વાવણી કરાયેલ પાકોમાં નુકસાનીની ભીતિ સેવાઈ રહી છે. સાથે કપાસ, મગફળી, સોયાબીન, મરચા સહિતના પાકોમાં પાણી ભરાતા ખેડૂતોની હાલત કફોડી બની છે. સતત ત્રણ દિવસથી અવિરત વરસેલા વરસાદને પગલે મોટાભાગના ખેતરો બેટમાં ફેરવાયા છે. તેમજ નીચાણવાળા વિસ્તારોમાં પાણી ભરાતા સ્થાનિકોને પણ ભારે હાલાકી ભોગવવાનો વારો આવ્યો છે. ત્યારે વરસાદે સર્જેલી તારાજીને પગલે થયેલા નુકસાનને લઇ ખેતીવાડી વિભાગ તેમજ સરકારી તંત્ર દ્વારા નુકસાનીનું સર્વે કરી ખેડૂતોને યોગ્ય વળતર આપવા માંગ કરવામાં આવી છે. સાથોસાથ ઉપરવાસમાંથી સતત પાણીની આવક થતા હરણાવ તેમજ ખેડવા જળાશયમાંથી હરણાવ નદીમાં પાણી છોડવામાં આવી રહ્યા છે. નદીમાં પાણી છોડાયાને પગલે ખેડબ્રહ્મા પંથકમાંથી પસાર થતી હરણાવ નદી કિનારેના વિસ્તારોમાં પણ પૂર જેવી સ્થિતિ નિર્માણ થતા ખેડૂતોનો ચોમાસુ પાક વરસાદી પાણીમાં ધોવાયો છે.

જળાશયમાંથી પાણી છોડા
સામાન્ય રીતે ચોમાસાની ઋતુમાં નદી, નાળા સહિત જળાશયો માં પાણીની આવક થતી હોય છે. જોકે અંતરિયાળ વિસ્તાર સહિત ઉપરવાસમાં ભારેથી અતિભારે મેઘ મહેર થતાં વિજયનગરના હરણાવ જળાશયમાં પાણીની આવક નોંધાઈ હતી. જેને પગલે હરણાવ જળાશયમાંથી પાણી છોડાતા ગ્રામ્ય પંથકમાંથી પ્રસાર થતી હરણાવ નદીએ રૌદ્ર સ્વરૂપ ધારણ કર્યું હતું. નદીઓ ગાંડીતૂર બનતા નીચાણવાળા વિસ્તારો સહિત ગ્રામ્ય પંથકમાં પાણી ધુસીજતા ખેતરો સહિત નીચાણવાળા વિસ્તારોના મકાનો રોડ રસ્તાને ભારે નુકસાન થયું છે. ત્યારે આવનાર સમયમાં નુકસાનીનું સર્વે કરી ખેડૂતોને યોગ્ય વળતર મળે તેને લઈ પંચાયત દ્વારા પ્રયાસો સર્વે કરી ખેતીવાડી વિભાગ તેમજ તંત્રને સર્વે કરી યોગ્ય વળતર મળે તેને લઈને સ્થાનિક પંચાયતના તલાટી દ્વારા પણ ઉપલી કક્ષાએ રજૂઆત કરાશે અને ખેડૂતોને વળતર ચુકવા માટે તંત્રને જાણ કરાશે.

મેઘરાજાએ ધમાકેદાર બેટિંગ કરી
ઉપરવાસમાં ભારે વરસાદને પગલે સાબરકાંઠા જિલ્લામાં ભારે વરસાદ થવાથી ખેડબ્રહ્માના ગ્રામ્ય વિસ્તારોમાં મેઘરાજાએ ધમાકેદાર બેટિંગ કરી છે. જેને લઈ ખેડબ્રહ્માના ગ્રામ્ય વિસ્તાર દેરોલ રોદરા સહિતના આસપાસના ગામોમાં પાક નિષ્ફળ ગયા છે. તેમજ સમગ્ર પાક પાણી ના પ્રવાહમાં તણાઈ ગયો છે. સ્થાનિક લોકોને આર્થિક નુકસાન થઈ રહ્યું છે. ત્યારે સરકાર પાસે અપેક્ષા રાખી રહ્યા છે કે તાત્કાલિક ધોરણે સર્વે કરી યોગ્ય કામગીરી કરવામાં આવે તેમજ ખેડૂતોને વળતર ચૂકવવામાં આવે ત્યારે જોવાનું એ રહે છે. આવનાર સમયમાં નુકસાનીનું સર્વે કરી ખેડૂતોને વળતર સહિતની ચૂકવણી કયારે કરવામાં આવે છે.