Narendra Modi: રશિયાના તેલ અને ટેરિફને લઈને ભારત અને અમેરિકા વચ્ચેના સંબંધોમાં તણાવ છે. અમેરિકાના રાષ્ટ્રપતિ ડોનાલ્ડ ટ્રમ્પે ફરી એકવાર વડાપ્રધાન નરેન્દ્ર મોદીને ખૂબ સારા મિત્ર કહ્યા છે. પીએમ મોદીએ તેની પ્રતિક્રિયા આપી છે.

વડાપ્રધાન મોદીએ એક્સ પોસ્ટમાં જણાવ્યુ છે કે, ‘ભારત અને અમેરિકા નજીકના મિત્રો અને નેચરલ પાર્ટનર્સ છે. મને ખાતરી છે કે આપણી વેપાર વાટાઘાટો ભારત-અમેરિકા ભાગીદારીની અમર્યાદિત શક્યતાઓના દરવાજા ખોલશે. અમારી ટીમો શક્ય તેટલી વહેલી તકે આ અંગે ચર્ચા કરવા માટે કામ કરી રહી છે. મને રાષ્ટ્રપતિ ટ્રમ્પ સાથે વાત કરવાની પણ આશા છે. અમે બંને દેશોના લોકો માટે એક સુવર્ણ અને વધુ સમૃદ્ધ ભવિષ્ય બનાવવા માટે કામ કરીશું.’

ઉલ્લેખનીય છે કે, અગાઉ યુએસ પ્રમુખ ડોનાલ્ડ ટ્રમ્પે સોશિયલ મીડિયા પ્લેટફોર્મ ટ્રુથ સોશિયલ પર પોસ્ટ કરી હતી અને કહ્યું હતું કે, તેમને એ જાહેરાત કરતા આનંદ થાય છે કે ભારત અને અમેરિકા વેપાર અવરોધોને દૂર કરવા માટે વાતચીત ચાલુ રાખી રહ્યા છે. તેમણે કહ્યું હતું કે, હું આગામી અઠવાડિયામાં મારા ખૂબ જ સારા મિત્ર વડાપ્રધાન મોદી સાથે વાત કરવા માટે આતુર છું. મને ખાતરી છે કે આ સંવાદ આપણા બંને મહાન દેશો માટે સફળ નિષ્કર્ષ લાવશે.

આવું પહેલીવાર નથી બન્યું. ગયા શનિવારે ટ્રમ્પે પીએમ મોદી અને અમેરિકા વચ્ચેના મજબૂત સંબંધો પર ભાર મૂક્યો હતો, તેમણે અમેરિકા-ભારત સંબંધોને 'ખાસ' ગણાવ્યા હતા. ટ્રમ્પે કહ્યું હતું કે, હું હંમેશા પીએમ મોદીનો મિત્ર રહીશ. તેઓ એક મહાન વડાપ્રધાન છે. હું હંમેશા તેમનો મિત્ર રહીશ, પરંતુ મને તે હાલમાં જે કરી રહ્યા છે તે ગમતું નથી. પરંતુ ભારત અને અમેરિકા વચ્ચેનો સંબંધ ખૂબ જ ખાસ છે. ચિંતા કરવાની કોઈ વાત નથી. ક્યારેક કેટલાક મતભેદો થતા હોય છે.