Rajasthan by election Results 2024 : રાજસ્થાન પેટાચૂંટણીમાં ભાજપે શાનદાર પ્રદર્શન કર્યું છે. પાર્ટીએ 7માંથી 5 સીટોનું જીતવાનું લગભગ નક્કી છે. જો ભાજપના દૃષ્ટિકોણથી જોવામાં આવે તો પેટાચૂંટણીના પરિણામો તેમના માટે ખૂબ જ સુખદ રહ્યા છે. આ સાથે જ કોંગ્રેસ અને હનુમાન બેનીવાલને પેટાચૂંટણીમાં ઝટકો લાગ્યો છે. રાષ્ટ્રીય લોકતાંત્રિક પાર્ટીના ગઢ ગણાતા ખિંવસરમાં પણ ભાજપના રેવંતરામ ડાંગાનો વિજય થયો છે.

ભાજપે કઈ બેઠકો પર જીત મેળવી? ભાજપે દેવલી ઉનિયારા અને ઝુંઝુનુમાં મોટી જીત નોંધાવી છે. આ બંને બેઠકો પર ભાજપનો વિજય માર્જિન 40,000થી વધુ મતો હતો. ઝુંઝુનુ કોંગ્રેસનો ગઢ માનવામાં આવે છે. આ બે બેઠકો સિવાય રામગઢ, ખિંવસર અને સલૂંબરમાં ભાજપે જીત મેળવી છે. વર્ષ 2023માં પણ સલૂંબર એકમાત્ર સીટ હતી જેના પર ભાજપે જીત મેળવી હતી. પરંતુ આ વખતે તેમને ભારતીય આદિવાસી પાર્ટી તરફથી આકરી સ્પર્ધાનો સામનો કરવો પડ્યો છે.

ઝુંઝુનુથી રાજેન્દ્ર ભાંબુ, ખિંવસરથી રેવંતરામ ડાંગા, સલૂંબરથી શાંતા દેવી, દેવલી ઉનિયારાથી રાજેન્દ્ર ગુર્જર અને રામગઢથી સુખવંત સિંહ ભાજપ તરફથી જીતવામાં સફળ રહ્યા છે. આ સાથે જ દૌસામાં કોંગ્રેસને સફળતા મળી છે. જોકે, અહીં ભાજપે રિકાઉન્ટિંગની માંગ કરી છે. ચોર્યાસી બેઠક જાળવી રાખી છે. નોંધનીય છે કે, કેટલીક સીટો પર સત્તાવાર જાહેરાત થવાની બાકી છે.