Accident: રાજસ્થાનના જોધપુર-જૈસલમેર નેશનલ હાઇવે પર રવિવારે વહેલી સવારે એક દુ:ખદ માર્ગ અકસ્માત થયો. રામદેવરા દર્શને જઇ રહેલા ગુજરાતના શ્રદ્ધાળુઓને લઈ જતો ટેમ્પો પૂરપાટે આવતી ટ્રક સાથે અથડાયો હતો.આ ભયાનક અકસ્માતમાં પાંચ શ્રદ્ધાળુઓના મોત થયા છે જ્યારે મહિલાઓ અને બાળકો સહિત 14 લોકો ગંભીર રીતે ઘાયલ થયા છે. તમામ ઘાયલોની સારવાર જોધપુરની MDM હોસ્પિટલમાં ચાલી રહી છે.

આ અકસ્માત નેશનલ હાઇવે 125 પર ખારી બેરી ગામ નજીક સવારે 5_30 વાગ્યે થયો હતો. બાલેસર પોલીસ સ્ટેશનના અધિકારી મૂળ સિંહ ભાટીએ જણાવ્યું હતું કે બાજરીની બોરીઓથી ભરેલો એક ટ્રક કાબુ ગુમાવી બેઠો અને સામેથી આવી રહેલા ટેમ્પો સાથે અથડાઈ ગયો. ટક્કર એટલી ગંભીર હતી કે ટેમ્પોનો આગળનો ભાગ સંપૂર્ણપણે તૂટી ગયો હતો અને ટ્રક પણ પલટી ગઈ હતી.

ટેમ્પોની આગળની સીટ પર બેઠેલા મહેન્દ્રએ જણાવ્યું હતું કે બધા શ્રદ્ધાળુઓ ગુજરાતના સાબરકાંઠા જિલ્લામાંથી રામદેવરાના દર્શન કરવા માટે રવાના થયા હતા.અકસ્માત બાદ ત્રણ શ્રદ્ધાળુઓનું ઘટનાસ્થળે જ મૃત્યુ થયું હતું જ્યારે બે શ્રદ્ધાળુઓનું જોધપુરમાં સારવાર દરમિયાન મૃત્યુ થયું હતું. અકસ્માત પછી તરત જ પસાર થતા વાહનચાલકોએ ઘાયલોને મદદ કરવા માટે તેમના વાહનો રોકી દીધા હતા અને પોલીસ અને એમ્બ્યુલન્સને જાણ કરી હતી. બાલેસર, અગોલાઈ અને હાઇવે સર્વિસથી ત્રણ એમ્બ્યુલન્સ તાત્કાલિક પહોંચી હતી.

ઘાયલોને શરૂઆતમાં બાલેસર સીએચસી લઈ જવામાં આવ્યા હતા જ્યાં પ્રાથમિક સારવાર બાદ બધાને જોધપુર રિફર કરવામાં આવ્યા હતા. પોલીસે મૃતકોના મૃતદેહને બાલેસર સીએચસી શબઘરમાં જમા કરાવ્યા છે અને ટ્રક ડ્રાઈવરની શોધખોળ શરૂ કરી છે.