જયેશ ચૌહાણ,અમદાવાદ: સુપ્રીમકોર્ટ દ્વારા વર્ષ 2020માં પરમવીર શૈની કેસમાં ચુકાદો આપતા કહ્યું હતું કે દેશના તમામ પોલીસ મથકોમાં CCTV હોવા જરૂરી છે. પરંતુ અનેકવખત સુપ્રીમકોર્ટના આદેશનું ઉલ્લંઘન થતું હોવાની વાતો સામે આવતી રહે છે. ત્યારે આજે એક સુનાવણી દરમિયાન ગુજરાત હાઈકોર્ટે રાજ્ય સરકાર પાસે ગુજરાતના તમામ પોલીસ મથકોમાં લાગેલા CCTV અંગે એક રિપોર્ટ ગુજરાત હાઈકોર્ટની રજિસ્ટ્રીમાં સબમિટ કરવાનો આદેશ આપ્યો છે.

મહીસાગરના લુણાવાડા પોલીસ સ્ટેશનમાં 2 અસીલના વકીલોને માર મારવાનો અને ગેરવર્તણુંક કરવાની ફરિયાદ કરવામાં આવી હતી. પોલીસ સ્ટેશનમાં લગાવેલા CCTV ઉપલબ્ધ ન હોવાથી અરજદાર દ્વારા ફરિયાદ પણ કરવામાં આવી હતી. બાદમાં ગુજરાત હાઈકોર્ટમાં એક જાહેરહિતની અરજી કરવામાં આવી હતી. જેના પર આજે ગુજરાત હાઈકોર્ટના ચીફ જસ્ટિસ સુનિતા અગ્રવાલની ખંડપીઠ સમક્ષ સુનાવણી થઈ હતી. ત્યારે ગુજરાત હાઈકોર્ટે એવું કારણ આપતા અરજી ફગાવી દિધી હતી કે આ 2 અરજદારોની અંગત બાબત છે. જેથી તેને જાહેરહિતની અરજી ગણી શકાય નહીં અને અરજદારને ઉપરી અધિકારીઓને આ બાબતે રજૂઆત કરવા કહ્યું હતું.

ગૃહ વિભાગના ACS પાસે માગ્યો રિપોર્ટ
ગુજરાત હાઈકોર્ટના ચીફ જસ્ટિસની ખંડપીઠે અરજી ફગાવતા એડી. એડવોકેટ જનરલ મનીષા લવકુમાર શાહને નિર્દેશ કર્યા હતા કે સુપ્રીમકોર્ટના નિર્દેશ મુજબ તમામ પોલીસ સ્ટેશનોમાં CCTV લાગેલા હોવા જોઈએ એ દરમિયાન એડી. એડવોકેટ જનરલ દ્વારા દલીલ કરાઈ હતી કે પ્રક્રિયા ચાલુ છે અને મોટાભાગના પોલીસ સ્ટેશનોમાં કેમેરા લાગી ચૂક્યા છે. ટેન્ડરીંગ પ્રક્રિયા પણ થઈ ચૂકી છે બાદમાં ચીફ જસ્ટિસની ખંડપીઠ દ્વારા આદેશ કરવામાં આવ્યો હતો કે ગુજરાતના પોલીસ સ્ટેશનોમાં લાગેલા CCTV, તેની રેકોર્ડિંગ ક્ષમતા અને સ્ટોરેજ કેપેસિટી સહિતની બાબતોનો એક રિપોર્ટ ગુજરાત રજિસ્ટ્રીમાં સબમિટ કરાવવામાં આવે અને CCTV લાગેલા ન હોય અથવા કોઈ ખામી આવી હોય તો જવાબદાર વ્યક્તિની જવાબદારી નક્કી કરી પગલાં લેવામાં આવે. આગામી દિવસોમાં આ સમગ્ર મામલે વધુ સુનાવણી હાથ ધરાશે.