સુરતઃ બિલ્ડર વજુ કાત્રોડીયાને ધમકાવીને તેની પાસેથી બે કરોડ રૂપિયાની ખંડણી માગવાના કેસમાં સુરતના કાપોદ્રા પોલીસ સ્ટેશનમાં એક ફરિયાદ નોંધાઈ હતી. આ કેસમાં કાપોદ્રા પોલીસે ટિકટોક સ્ટાર કીર્તિ પટેલ સહિત કુલ 6 લોકો સામે ગુનો દાખલ કર્યો હતો. આ કેસમાં મુખ્ય આરોપી વિજય સવાણીની ધરપકડ કરવામાં આવી હતી. ત્યારે હવે એક વર્ષ બાદ કીર્તિ પટેલની ધરપકડ કરવામાં આવી છે.

કાપોદ્રા પોલીસ સ્ટેશનમાં એક વર્ષ પટેલ કીર્તિ પટેલ અને વિજય સવાણી સામે ફરિયાદ કરનારા વજુ કાત્રોડિયા અને વિજય સવાણીને અગાઉ એક પ્રોપર્ટીની લેતી દેતી મામલે કોર્ટમાં કેસ ચાલી રહ્યો છે. આ કેસ બોર્ડ ઉપર આવવાનો હોવાથી વિજય સવાણી અને તેના સાગરીતોએ સાથે મળીને વજુ કાત્રોડિયા પાસેથી બળજબરીથી પૈસા કઢાવવા ઈચ્છતો હતો અને એટલા માટે જ વિજય સવાણીએ કીર્તિ પટેલ અને તેના સાગરીતો સાથે મળીને સોશિયલ મીડિયા પર વજુ કાત્રોડીયાને બદનામ કરવાના કાવતરાઓ કર્યા હતા.

વજુ કાત્રોડીયાના ફોટા સાથે રિલ્સ કીર્તિ પટેલ અને વિજય સવાણીએ અપલોડ કરી હતી. આ ઉપરાંત કીર્તિ પટેલ દ્વારા ફરિયાદી અને તેના પરિવારને સોશિયલ મીડિયામાં લાઈવ થઈને અપશબ્દો કહીને બદનામ કરવામાં આવતા હતા. આ ઉપરાંત મરાવી નાખવાની પણ ધમકી પણ આપવામાં આવી હતી.

આ કેસમાં ફરિયાદીને સમાધાન કરવા માટે કોસમાડા પાટીયા ખાતે આવેલા સિલ્વર ફાર્મમાં મળવા માટે બોલાવવામાં આવ્યા હતા. આ ફાર્મમાં જાનવી ઉર્ફે મનીષા ગૌસ્વામી, ઝાકીર, કીર્તિ પટેલ અને વિજય સવાણીએ ફરિયાદી વજુ કાત્રોડીયાને કોઈ ઠંડા પીણામાં નશીલો પદાર્થ પીવડાવી તેના ફોટા અને વિડિયોમાં બનાવીને ફરિયાદીને બ્લેકમેઇલ કરી સમાધાન માટે બે કરોડ રૂપિયાની માગણી કરી હતી. જો પૈસા નહીં આપે તો ફોટા અને વીડિયો instagram તેમજ અલગ અલગ સોશિયલ મીડિયામાં વાયરલ કરી ફરિયાદીને બદનામ કરવાની ધમકી આપી હતી.

ત્યારબાદ વજુ કાત્રોડીયાએ પૈસા ન આપતા અલગ અલગ સોશિયલ મીડિયાના માધ્યમોથી વિજય સવાણીએ તેમજ કીર્તિ પટેલે ફરિયાદી નાની દીકરીઓ સાથે બળાત્કાર કરે છે. તેમજ તેની પત્નીના ફોટા ક્યાંકથી મેળવીને અલગ અલગ લખાણની સ્ટોરીઓ મૂકી ખોટા કેસમાં ફરિયાદીને ફસાવવાની ધમકી આપી હતી. તેથી આ સમગ્ર મામલે એક વર્ષ પહેલાં વજુ કાત્રોડિયા દ્વારા કાપોદ્રા પોલીસ સ્ટેશનમાં ફરિયાદ કરવામાં આવતા પોલીસે વિજય સવાણીની ધરપકડ કરી હતી. કીર્તિ પટેલ સહિત અન્ય ઈસમોને વોન્ટેડ જાહેર કર્યા હતા. ત્યારે હવે આ કેસમાં એક વર્ષ બાદ કીર્તિ પટેલની ધરપકડ કરવામાં આવી છે.

ફરિયાદ દાખલ થઈ તે સમયે પોલીસના હાથે ઝડપાયેલા વિજય સવાણી સામે અગાઉ સુરતના સરથાણા પોલીસ સ્ટેશનમાં ચાર ગુના, કામરેજ પોલીસ સ્ટેશનમાં એક ગુનો અને કાપોદ્રા પોલીસ સ્ટેશનમાં એક ગુનો નોંધાયો છે. આમ, કુલ 6 ગુનાઓ વિજય સવાણી સામે નોંધાયા છે. તો કીર્તિ પટેલ પણ અવારનવાર વિભાગમાં આવી ચૂકી છે અને વિવાદ બદલ અલગ અલગ પોલીસ સ્ટેશનમાં તેની સામે ગુના પણ દાખલ થયા છે. ત્યારે કાપોદ્રા પોલીસે એક વર્ષ પહેલાં નોંધાયેલા ગુનામાં કીર્તિ પટેલની ધરપકડ કરી છે.