અમિત રુપાપરા, સુરતઃ ફૂડ વિભાગે 3થી 15 નવેમ્બર દરમિયાન વિવિધ ડેરીમાંથી લીધેલા ઘી, ચીઝ એનાલોગ અને કાઉમિલ્કના સેમ્પલમાં ભેળસેળ પકડાઈ છે. કુલ 6 સંસ્થાઓના નમૂનામાં ભેળસેળ અને અનસેફ માલ હોવાનું સામે આવ્યું છે. જેમાં બે ડેરીમાંથી 33 કિલો ચીઝ એનાલોગનો નાશ કરાયો છે. તમામ 6 સંસ્થાઓ સામે કાયદેસરની કાર્યવાહી હાથ ધરાઈ છે.

તાજેતરમાં સુરભી ડેરીમાં અખાદ્ય પનીર પકડાયા બાદ સુરત મહાનગરપાલિકાનો ફૂડ વિભાગ સખત એક્શન મોડમાં આવ્યો છે. શહેરની જનતાને શુદ્ધ અને સુરક્ષિત ખાદ્ય સામગ્રી મળી રહે તે હેતુથી, ફૂડ વિભાગ દ્વારા 3 નવેમ્બરથી 15 નવેમ્બર સુધી શહેરભરમાં મોટી ઝુંબેશ હાથ ધરી વિવિધ ડેરી અને વેપારી સંસ્થાઓમાંથી દૂધની બનાવટોના સેમ્પલ લેવામાં આવ્યા હતા.

આ વિશેષ ડ્રાઇવ દરમિયાન ફૂડ વિભાગની ટીમે ખાસ કરીને પનીર એનાલોગ, ચીઝ એનાલોગ અને ઘીના સેમ્પલ એકત્રિત કર્યા હતા. આ તમામ નમૂનાઓને પૃથક્કરણ માટે પબ્લિક હેલ્થ લેબોરેટરી ખાતે મોકલવામાં આવ્યા હતા. લેબોરેટરીના રિપોર્ટમાં ચોંકાવનારી વિગતો સામે આવી છે, જેમાં કુલ 6 જેટલી અલગ અલગ સંસ્થાઓના ઘી, કાઉ મિલ્ક અને ચીઝ એનાલોગ ભેળસેળયુક્ત અને અનસેફ હોવાનું પુરવાર થયું છે.

ભેળસેળ અને અનસેફ માલ ધરાવતી સંસ્થાઓમાં એલ એચ રોડ પર આવેલી એચ એલ ફ્રોઝન ફૂડમાંથી લેવામાં આવેલો ચીઝ એનાલોગનો નમૂનો ભેળસેળયુક્ત જણાયો.ગોડાદરાની શિવ ધર્મરાજ ડેરીમાંથી લીધેલો ચીઝ એનાલોગનો નમૂનો પણ ભેળસેળયુક્ત જાહેર થયો.નઉધનાની એસ.પી. માર્કેટિંગમાંથી લેવામાં આવેલું કાઉ મિલ્ક ભેળસેળયુક્ત હોવાનું સામે આવ્યું છે.

ખટોદરાની જય ગાયત્રી ડેરી પ્રોડક્ટમાંથી લેવામાં આવેલા ઘીના નમૂનામાં ભેળસેળ પકડાઈ. નાનપુરાના બારાહજારી મહોલ્લામાં આવેલી ઇન્ડિયા ડેરીમાંથી લીધેલા ઘીના નમૂનામાં પણ ભેળસેળ મળી આવી. મોટા વરાછાના ક્રિષ્ના ટાઉનશિપમાં આવેલી ઘી પેલેસમાંથી લેવામાં આવેલું ભેંસનું ઘી ટેસ્ટમાં અનસેફ હોવાનું જાહેર થયું છે.

આ રિપોર્ટના આધારે, ફૂડ વિભાગે તાત્કાલિક કાર્યવાહી હાથ ધરી ગોડાદરાની શિવ ધર્મરાજ ડેરી અને એલ એચ રોડ પરની એચ એલ ફ્રોઝન ફૂડમાંથી મળી આવેલા કુલ 33 કિલોગ્રામ ચીઝ એનાલોગના જથ્થાનો સ્થળ પર જ નાશ કર્યો હતો, જે અખાદ્ય જાહેર થયો હતો. ઉલ્લેખનીય છે કે, ઘી પેલેસમાંથી લેવામાં આવેલું ભેંસનું ઘી રિપોર્ટમાં અનસેફ જાહેર થયું છે, જે ગ્રાહકોના સ્વાસ્થ્ય માટે ગંભીર જોખમ ઊભું કરી શકે છે.

ફૂડ વિભાગ દ્વારા આ તમામ 6 સંસ્થાઓ સામે ફૂડ સેફ્ટી અને સ્ટાન્ડર્ડ એક્ટ અંતર્ગત કાયદેસરની કાર્યવાહી હાથ ધરવામાં આવી છે. આ તમામ કેસમાં એડઝીક્યુટિંગ ઓફિસર સમક્ષ ફરિયાદ દાખલ કરવાની કાર્યવાહી શરૂ કરી દેવામાં આવી છે, જે અંતર્ગત આ વેપારીઓને દંડ અને અન્ય સજા થઈ શકે છે. સુરત ફૂડ વિભાગની આ આક્રમક કામગીરીએ ભેળસેળિયા તત્વોમાં ફફડાટ પેદા કર્યો છે.