સુરત: સોશિયલ મીડિયાનો ઉપયોગ કરતી સગીરાઓ માટે ચોકાવનારી ઘટના સામે આવી છે. સુરતના ઉમરવાડા વિસ્તારમાં રહેતી સગીરાનો સંપર્ક સોશિયલ મીડિયાના માધ્યમથી 25 વર્ષીય યુવક સાથે થયો હતો અને ત્યારબાદ આ યુવકે પ્રેમ સંબંધની આડમાં વિદ્યાર્થી સાથે શારીરિક સંબંધ બાંધ્યો હતો અને સગીરા ગર્ભવતી થતા સમગ્ર મામલો પોલીસ સ્ટેશન સુધી પહોંચ્યો પોલીસે આ નરાધની ધરપકડ કરી વધુ તપાસ હાથ ધરી છે.

સુરતના પુણા પોલીસ સ્ટેશન હદ વિસ્તારમાં આવેલા ઉમરવાડા વિસ્તારમાં રહેતી સગીરા સોશિયલ મીડિયાના માધ્યમથી રાજીવ નગરમાં રહેતા 25 વર્ષના પંકજ સરોજ સાથે મુલાકાત થઈ હતી. સોશિયલ મીડિયામાં આ સગીરા અને 25 વર્ષીય પંકજ વાતો કરતા હતા અને ત્યારબાદ બંને વચ્ચે સારી મિત્રતા બંધાઈ હતી અને બંને મોબાઈલ નંબરની આપ લે પણ કરી હતી.

સોશિયલ મીડિયામાં બંધાયેલી મિત્રતા મોબાઈલ નંબર સુધી પહોંચી અને મોબાઈલ નંબરની આપ લે બાદ સગીરા અને 25 વર્ષ બંને એકબીજા સાથે વાત કરતા હતા. તે સમયે પંકજે મીઠી મીઠી વાતો કરીને આ સગીરાને પ્રેમ જાળમાં ફસાવી હતી. ત્યારબાદ અનેક વખત પુણા પોલીસ સ્ટેશન હદ વિસ્તારમાં ખાડી કિનારે બોલાવી એકાંતમાં વિદ્યાર્થીની સાથે પંકજે શારીરિક સંબંધ બાંધ્યા હતા.

3 જૂન 2025ના રોજ સગીરાને એકાએક જ પેટમાં દુખાવો થતાં તેને સારવાર માટે પરિવારના સ્મીમેર હોસ્પિટલમાં લઈ ગયા હતા. જ્યાં સગીરાની તપાસ કરતા ડોક્ટર પણ ચોકી ઉઠ્યા હતા. કારણ કે સગીરાને ચાર માસની ગર્ભ હોવાનું સામે આવ્યું છે. ડોક્ટરે આ વાત પરિવારના સભ્યોને કરતા સગીરાના માતા-પિતાના પગ તળેથી જમીન ખસી ગઈ અને ત્યારબાદ સગીરાના પરિવારના સભ્યોએ આ સમગ્ર મામલે સગીરાની પૂછપરછ કરતાં સામે આવ્યું હતું કે, પંકજ એ દુષ્કર્મ આચરતા સગીરા ગર્ભવતી બની છે. આ સમગ્ર મામલે પુણા પોલીસ સ્ટેશનમાં ફરિયાદ નોંધાયા બાદ પોલીસે પંકજ સામે દુષ્કર્મનો ગુનો નોંધી તેની ધરપકડ કરી વધુ તપાસ હાથ ધરી છે. તો બીજી તરફ સગીરાના પરિવારના સભ્યો દ્વારા કોર્ટમાં ગર્ભપાત માટે મંજૂરી માગતી અરજી પણ કરવામાં આવી છે.