Ahmedabad: ગુજરાતમાં સાબરકાંઠા સહિત મહેસાણા, પાટણ અને અરવલ્લીમાં ભારે વરસાદને પગલે ઓરેન્જ એલર્ટ આપવામાં આવ્યું છે. ત્યારે ઉત્તર ગુજરાતની જીવાદોરી ગણાતી સાબરમતી નદીમાં પણ વ્યાપક પાણીની આવકમાં વધારો નોંધાઈ રહ્યો છે. જેના પગલે ધરોઈ જળાશય ભયજનક સપાટી નજીક પહોંચતા હાલમાં દરવાજા ખોલાયા છે. આ સાથે ધરોઈ ડેમમાંથી સાબરમતી નદીમાં પાણી છોડાતા નીચાણવાળા વિસ્તારો સહિત સાત જેટલા જિલ્લાને એલર્ટ કરવામાં આવ્યા છે.

ભારે વરસાદ બાદ ધરોઈ ડેમમાંથી છોડવામાં આવેલ પાણીને લઈને એલર્ટ આપવામાં આવ્યું છે. ધરોઈ ડેમમાંથી 51848 ક્યુસેક પાણી છોડ્યું છે. ત્યારે સંત સરોવર ખાતેથી 96234 ક્યુસેક પાણી છોડયુ છે અને વાસણા બેરેજમાંથી 94056 પાણી છોડવામાં આવી રહ્યું છે. પાણીની આવક વધતા વાસણા બેરેજની સપાટી 131 ફૂટ પહોંચી ગઈ છે. જેને લઈને હવે સુભાષ બ્રિજ પાસે સાબરમતી નદીનું લેવલ 43.65 મીટર પહોંચ્યું છે.

નોંધનીય છે કે, સાબરમતી સુભાષ બ્રિજ ખાતે વ્હાઇટ સિગ્નલ જાહેર કરાયું છે. જોકે, વાસણા બેરેજના 3થી 29 ગેટ ફ્રી ફલો ખુલ્લા કરવામાં આવ્યા છે. જેને લઈને અનેક ગામોમાં એલર્ટ આપવામાં આવ્યું છે. ધંધુકા અને દસક્રોઈ તાલુકાના 18 ગામમાં એલર્ટ પર, બાવળાના નવ ગામો અને સાણંદના 14 ગામો એલર્ટ પર અને ધોળકાના 74થી વધુ ગામો એલર્ટ પર મુકાયા છે.